Operacion për riformimin e kafkës

Astrit Lulushi, Zëri i Amerikës

Një foshnje 5-muajshe, që vuan nga  një sëmundje e rrallë, duket sikur ka lindur përsëri, falë një ndërhyrjeje kirugjike të mjekëve në spitalin  Peyton Manning në Indianapolis. Vajza 5-muajshe Kaydence Theriault  po e merr veten nga një operacion që familja e saj dhe mjekët shpresojnë se do t’i ndryshojë jetën. Gjatë një operacioni të vështirë, një ekip mjekësh copëtoi kafkën saj dhe e bashkoi përsëri duke i dhënë formën e duhur.

Kaydence kishte lindur me një çrregullim gjenetik të quajtur sindroma Crouzon e cila shkakton mbylljen e parakohëshme të kafkës gjatë formimit të foshnjes në fetusin e nënës. Një mbyllje e tillë e parakohëshme pengon rritjen e trurit. Kjo e detyron masën e trurit që të gjejë zona të hapura duke shkaktuar deformime a shtrembërime të kokës. Ekipi i mjekëve përdori imazhe kompjuterike dhe modele, si dhe konsulta telemjekësore dhe bioinxhinjerinë për të ndihmuar Kaydencën 5 muajshe. Gjatë këtij operacioni kolektiv që zgjati 6 orë, mjekët arritën të riformojnë kafkën e kokës së foshnjes duke e çliruar atë nga presioni i trurit. Kaydenca është trinjake, motra Kaylin dhe vëllai Taylor, po 5 muajsh, vuajnë gjithashtu nga sindorma Krouzon, dhe janë planifikuar të operohen muajin e ardhshëm.