Ushtrimet pamore përmirësojnë kujtesën

Astrit Lulushi, Zëri i Amerikës

Një program ushtrimesh fizike ka treguar se mund të përmirësojë kujtesën tek të moshuarit, të paktën për një periudhë të shkurtër menjëherë pas programit. Rezultatet e para treguan se ushtrime të thjeshta vizuale mund të përmirësojë kujtesën afatshkurtër vizuale. Truri mund të ketë nevojë për stërvitje ashtu si edhe trupi. Studjuesit në Universitetin e Kalifornisë në San Francisko vëshguan nga afër një program për stërvitjen e trurit për të parë nëse mund të ndihmonte në përmirësimin e kujtesës tek të rriturit. Të moshuar të shëndetshëm u përfshinë në një program me lojra kompjuterike që kishte për qëllim përmirësimin e kujtesës vizuale të punës; një funksion në tru që ruan të informata për periudha të shkurtra kohe. Kujtimet e pjesmarrësve u regjistruan para fillimit të programit, dhe një javë pas përfundimit të tij. Rezultatet treguan se kujtesa pamore u përmirësua rreth dhjetë për qind, duke e ngritur nivelin e kujtesës së tyre në mnjë nivel me kujtesën e më të rinjve në moshë. Kjo ngritje niveli i kujtesës ishte afatshkurtër, por studiuesit mendojnë se me programe të rregullta, ky nivel edhe mund të ruhet. Ndërsa në treg sot ka shumë lojra e programe për stërvitjen e trurit, nuk ekzistojnë prova se ato janë të suksesëshme. Studimi i fundit duket se ndihmon për gjetjen e rrugëve të reja më të mira për përmirësimin e kujtesës tek të rriturit dhe të moshuarit.