Një vaksinë e rikombinuar kundër kancerit në gji dhe vezore duket premtuese

Astrit Lulushi, Zëri i Amerikës

Vaksina e re rikombinuar (Transvac) quhet Poxviral dhe një studim në revistën “Klinical Cancer Research”” thotë se ajo është treguar e efektshme për ngadalësimin e zhvillimit të kancerit në gji dhe vezore – dhe në zgjatjen e jetës së pacienteve.

Në studim u përfshinë 26 gra me kancer në gji e vezore, të cilat ishin trajtuar më parë me kimoterapi.

Për 12 paciente me kancer në gji, vaksina e vonoi 12 muaj e gjysmë përparimin e sëmundjes dhe zgjati mbijetesën mesatarisht afro 14 muaj.

Për 14 pacientet me kancer në vezore, avancimi i sëmundjes u vonua 2 muaj – dhe mbijetesa u zgjat mesatarisht 15 muaj.

Autorët e studimit thonë se këto prova klinike tregojnë se vaksina e rikombinuar Poxviral është përfituese për disa paciente dhe efektshmëria e saj varet nga ashpërsia e sëmundjes dhe fuqia e sistemit të tyre imunitar.

Shkencëtarët thonë se disa paciente vazhduan të reagonin shumë mirë ndaj terapive të tjera, pas daljes nga studimi. Autorët thonë se shqyrtime e kërkime të tjera nevojiten.