Aspirina dhe lufta kundër kancerit

Astrit Lulushi, Zëri i Amerikës

Aspirina është ilaçi më i përgjithshëm. Marrja e saj është kthyer në një rit të përditshëm.

Thuajse çdo familje i mban ato në kabinetin e barnave – dhe bëjnë mirë sepse ekziston një mundësi shpresëdhënëse se aspirina lufton kancerin. Vetëm në Shtetet e Bashkuara, gati 1/3 e amerikanëve në moshë mesatare marrin rregullisht aspirinë për të ndihmuar parandalimin e goditjeve në zemër e në tru.

Por një grup studimesh të reja botuar në revistën mjekësore britanike Lancet tregon se aspirina mund t’i mbrojë njerëzit edhe nga një tjetër vrasës. Dihet prej kohësh se aspirina pakëson rrezikun e kancerit të zorrës së trashë. Por studimet e reja thonë se aspirina mund të ulë edhe rrezikun e prekjes nga kanceret në mushkëri, stomak, prostatë, mitër dhe vezore

Në rezultatet e tyre, autorët thonë se personat që marrin 1 aspirinë në ditë kanë më pak të ngjarë të preken ose të vdesin nga kanceri. Por ata sugjerojnë se për të ndjerë përfitimet e aspirinës, personi duhen t’a marrë atë çdo ditë për vite me radhë – nëse merr doza të ulta, duhen të paktën 5 vjet; dhe në doza më të larta te lejueshme, çdo ditë nga një pilulë, duhen 3 vjet.

Megjithatë, ekspertët tërheqin vërejtjen se këto rezultatet nuk janë përfundimtare dhe se studime të tjera tregojnë se marrja e aspirinës çdo ditë nuk sjell ndonjë përfitim kundër kancerit. Gjithashtu, aspirina mund të ketë efekte anësore, përfshi gjakderdhje të brendshme.